പി.എം. ശ്രീ പദ്ധതിയുമായി ബന്ധപ്പെട്ട് നിലനിൽക്കുന്ന തർക്കങ്ങൾ പരിഹരിക്കുന്നതിനായി മുഖ്യമന്ത്രി പിണറായി വിജയനുമായി സിപിഐ നേതൃത്വം തിങ്കളാഴ്ച ഉച്ചയ്ക്ക് ആലപ്പുഴയിൽ വെച്ച് ചർച്ച നടത്തും. സിപിഎം സംസ്ഥാന സെക്രട്ടറിയേറ്റ് യോഗത്തിന് ശേഷം മുഖ്യമന്ത്രി ആലപ്പുഴയിലേക്ക് പുറപ്പെട്ടിരുന്നു. ഈ ചർച്ചയിലൂടെ വിഷയം സമവായത്തിലേക്ക് എത്തുമെന്നാണ് രാഷ്ട്രീയ കേന്ദ്രങ്ങൾ കരുതുന്നത്.
ആലപ്പുഴയിൽ സിപിഐ അടിയന്തര സെക്രട്ടറിയറ്റ് യോഗം ചേർന്നിരുന്നു. യോഗത്തിന് ശേഷം പുറത്തിറങ്ങിയ സിപിഐ സംസ്ഥാന സെക്രട്ടറി ബിനോയ് വിശ്വമാണ് മുഖ്യമന്ത്രിയുമായി ഉച്ചയ്ക്ക് ചർച്ച ഉണ്ടാകുമെന്ന കാര്യം സ്ഥിരീകരിച്ചത്. പുന്നപ്ര-വയലാർ രക്തസാക്ഷി ദിനവുമായി ബന്ധപ്പെട്ട പരിപാടികൾക്കായി മുഖ്യമന്ത്രി ആലപ്പുഴയിൽ എത്തുന്നുണ്ട്.
സിപിഐ നേതാക്കളും മുഖ്യമന്ത്രിയും തമ്മിൽ ആലപ്പുഴയിലെ ഗസ്റ്റ് ഹൗസിൽ വെച്ചായിരിക്കും ചർച്ച നടക്കുക എന്നാണ് വിവരം. പി.എം. ശ്രീ പദ്ധതിയുമായി മുന്നോട്ടു പോകാൻ അനുവദിക്കുകയില്ല എന്ന നിലപാടിൽ സിപിഐ ഉറച്ചുനിൽക്കുകയാണ്. ഈ സാഹചര്യത്തിൽ, ഇവരുവരും തമ്മിലുള്ള ചർച്ചയിൽ ഏത് തരത്തിലുള്ള അനുനയ നീക്കമായിരിക്കും സംഭവിക്കുക എന്നതാണ് കേരളം ഉറ്റുനോക്കുന്നത്.
