ആഭ്യന്തര കലാപം രൂക്ഷമായ സിറിയയിലേക്കുള്ള എല്ലാ യാത്രകളും ഒഴിവാക്കണമെന്ന് പൗരൻമാർക്ക് മുന്നറിയിപ്പ് നല്‍കി ഇന്ത്യ.
സിറിയയിലെ യുദ്ധ സാഹചര്യം മുൻനിർത്തിയാണ് ഇന്ത്യൻ പൗരൻമാർക്ക് വിദേശകാര്യ മന്ത്രാലയം മുന്നറിയിപ്പ് നല്‍കിയത്. നിലവില്‍ സിറിയയിലുള്ള ഇന്ത്യക്കാരോട് ഡമാസ്കസിലെ ഇന്ത്യൻ എംബസിയുമായി ബന്ധപ്പെടാനും, കഴിവതും വേഗം നാട്ടിലേക്ക് മടങ്ങാനും വിദേശകാര്യമന്ത്രാലയം നിർദേശം നല്‍കി.
എംബസിയെ ബന്ധപ്പെടാനുള്ള ഹെല്‍പ്പ് ലൈൻ നമ്ബറും പുറത്തുവിട്ടു. യാത്രക്കാർക്ക് കടുത്ത അപകടസാധ്യതകള്‍ സിറിയയില്‍ നിലനില്‍ക്കുന്നുവെന്നും യാത്രാ മുന്നറിയിപ്പുണ്ട്. ഇനിയൊരു അറിയിപ്പ് ഉണ്ടാകുന്നതുവരെ സിറിയയിലേക്കുള്ള യാത്രകള്‍ ഒഴിവാക്കണമെന്നാണ് നിർദേശം. +963 993385973 എന്ന വാട്സ്‌ആപ്പ് നമ്ബറിലും [email protected] എന്ന ഇ-മെയിലോ ബന്ധപ്പെടാം.
സിറിയയുടെ വടക്കൻ മേഖലയില്‍ ആക്രമണം രൂക്ഷമാവുകയാണെന്നും സ്ഥിതിഗതികള്‍ വിലയിരുത്തുകയാണെന്നും ജാഗ്രത വേണമെന്നും വിദേശകാര്യ മന്ത്രാലയ വക്താവ് രണ്‍ധീർ ജയ്‌സ്വാള്‍ പറഞ്ഞു. വിവിധ യുഎൻ സംഘടനകളില്‍ പ്രവർത്തിക്കുന്ന 14 പേർ ഉള്‍പ്പെടെ 90 ഓളം ഇന്ത്യൻ പൗരന്മാർ സിറിയയിലുണ്ടെന്ന് ജയ്‌സ്വാള്‍ പറഞ്ഞു.
സിറിയൻ പ്രസിഡന്റ് ബാഷർ അല്‍ ആസാദ് സർക്കാരിനെതിരെ, ടർക്കിഷ് സായുധസംഘടനയായ ഹയാത്ത് തഹ്‌രീർ അല്‍ ഷാമിന്റെ നേതൃത്വത്തിലാണ് സായുധ കലാപം നടക്കുന്നത്.അലപ്പൊയ്ക്കു പിന്നാലെ മധ്യപടിഞ്ഞാറ് ഹമ പ്രവിശ്യയും വിമത സേന പിടിച്ചെടുത്തിരുന്നു. മയിലെ രണ്ട് വടക്കുകിഴക്കൻ ജില്ലകള്‍ വിമതരുടെ നിയന്ത്രണത്തിലാണ്. സെൻട്രല്‍ ജയില്‍ പിടിച്ചെടുത്ത് തടവുകാരെ മോചിപ്പിച്ചതായും വിമതർ അവകാശപ്പെട്ടിട്ടുണ്ട്. 2020 ന് ശേഷം സിറിയ കണ്ട ഏറ്റവും തീവ്രമായ പോരാട്ടമാണ് കഴിഞ്ഞ കുറച്ച്‌ ദിവസങ്ങളായി നടക്കുന്നത്.