എഡിഎം നവീൻ ബാബു ആത്മഹത്യ ചെയ്തതില്‍ കുടുംബാംഗങ്ങളുടെ മൊഴി ഇതുവരെയായിട്ടും അന്വേഷണസംഘം ശേഖരിച്ചിട്ടില്ലെന്ന് പരാതി.
ഇതിനെ തുടർന്ന് അഭിഭാഷകൻ ജോണ്‍ റാല്‍ഫ് കോടതിയില്‍ കഴിഞ്ഞ ദിവസം വാദമുന്നയിച്ചിരുന്നു. ജില്ലാ കളക്ടർ അരുണ്‍ കെ വിജയന്റെ മൊഴി വീണ്ടും എടുക്കുന്നതിലും ഇതുവരെയായിട്ടും തീരുമാനമായില്ല. നവീൻ ബാബുവിന്റെ ഭാര്യയുടെ മൊഴിയെടുക്കണമെന്നും ഫോണ്‍ രേഖകള്‍ പരിശോധിക്കണമെന്നും ആവശ്യപ്പെട്ട് കണ്ണൂർ മുൻ ജില്ലാ പ്രസിഡന്റ് പിപി ദിവ്യയും കോടതിയില്‍ ആവശ്യപ്പെട്ടിരുന്നു.
കണ്ണൂരില്‍ എഡിഎമ്മിന്റെ യാത്രയയപ്പ് സമ്മേളനം നടന്നിരുന്ന ഒക്ടോബർ 14ന് പെട്രോള്‍ പമ്ബ് അപേക്ഷകനായ ടി വി പ്രശാന്ത് വിജിലൻസ് ഓഫീസിലേക്ക് പോകുന്നതിന്റെ സിസിടിവി ദൃശ്യങ്ങളും പൊലീസ് ശേഖരിച്ചിട്ടുണ്ട്. സംഭവദിവസം ഉച്ചയ്ക്ക് 1.40നാണ് പ്രശാന്ത് ഓഫീസില്‍ നിന്ന് തിരികെ ഇറങ്ങിയത്. യാത്രയയപ്പ് യോഗത്തില്‍ ദിവ്യ ആരോപണം ഉന്നയിക്കും മുൻപ് കൈക്കൂലി വിഷയത്തില്‍ വിജിലൻസ് അന്വേഷണം തുടങ്ങിയിരുന്നുവെന്ന് തെളിയിക്കാൻ പ്രതിഭാഗവും ഈ ദൃശ്യങ്ങള്‍ ആവശ്യപ്പെട്ടിരുന്നു. അതേസമയം, ദിവ്യയുടെ ജാമ്യാപേക്ഷയില്‍ നാളെയാണ് തലശേരി ജില്ലാ കോടതി ഉത്തരവ് പറയുക. പളളിക്കുന്ന് വനിതാ ജയിലിലാണ് ഇപ്പോള്‍ ദിവ്യയുളളത്.
നവീൻ ബാബുവിന്റെ മരണവുമായി ബന്ധപ്പെട്ട് അരുണ്‍ കെ വിജയനെ പിന്തുണച്ച്‌ കഴിഞ്ഞ ദിവസം ഐഎഎസ് അസോസിയേഷനും രംഗത്തെത്തിയിരുന്നു. എഡിഎമ്മിന്റെ മരണത്തില്‍ കളക്ടർ പൊതുസമൂഹത്തില്‍ നിന്ന് വ്യക്തിപരമായ ആക്രമണം നേരിടുന്ന സാഹചര്യത്തിലാണ് അസോസിയേഷൻ പിന്തുണയുമായി രംഗത്തെത്തിയത്. അന്വേഷണത്തില്‍ അരുണ്‍ സത്യസന്ധമായി സഹകരിക്കുന്നുണ്ടെന്നും അസോസിയേഷൻ വ്യക്തമാക്കി.