ലോകത്തെ ഏറ്റവും ശക്തമായ മിസൈലായ ‘ഹ്വാസോംഗ് 19 ” വിജയകരമായി പരീക്ഷിച്ചെന്ന് ഉത്തര കൊറിയ.
വ്യാഴാഴ്ചയാണ് ഇന്റർകോണ്ടിനെന്റല്‍ ബാലിസ്‌റ്റിക് മിസൈലായ ഹ്വാസോംഗ് 19 ഉത്തര കൊറിയ വിക്ഷേപിച്ചത്. 86 മിനിറ്റ് പറന്ന മിസൈല്‍ രാജ്യത്തിന്റെ കിഴക്കൻ തീരത്ത് കടലില്‍ പതിച്ചു.
രാജ്യത്തിന്റെ മിസൈല്‍ പരീക്ഷണങ്ങള്‍ക്കിടെ ഏറ്റവും ദൂരം സഞ്ചരിച്ച മിസൈലാണിത്. മിസൈല്‍ 7,000 കിലോമീറ്റർ ഉയരത്തില്‍ വരെയെത്തി. ഉത്തര കൊറിയൻ ഏകാധിപതി കിം ജോംഗ് ഉന്നും മകളും മിസൈലിന്റെ വിക്ഷേപണം വീക്ഷിക്കുന്നതിന്റെ ദൃശ്യങ്ങള്‍ പുറത്തുവിട്ടു.
യു.എസിലെ ഏതൊരു പ്രദേശത്തെയും ലക്ഷ്യമിടാനുള്ള ശേഷി ഹ്വാസോംഗിനുണ്ടെന്നാണ് അവകാശപ്പെടുന്നത്. ദക്ഷിണ കൊറിയയുമായുള്ള ബന്ധം രൂക്ഷമായി തുടരുന്നതിനിടെയാണ് യു.എൻ നിയന്ത്രണങ്ങള്‍ മറികടന്ന് ഉത്തര കൊറിയ വീണ്ടും മിസൈല്‍ പരീക്ഷണം നടത്തിയിരിക്കുന്നത്.