ആഗോള ബോക്സ് ഓഫീസില്‍ നിന്ന് 20 കോടി ഗ്രോസ് കളക്ഷനുമായി ജീത്തു ജോസഫ് ചിത്രം ‘നുണക്കുഴി’. ചിത്രം ഹിറ്റ് ചാർട്ടില്‍ ഇടം പിടിക്കുമ്ബോള്‍ ബേസില്‍ ജോസഫ് എന്ന അഭിനേതാവിന്റെ കരിയറിലേക്ക് മറ്റൊരു ഹിറ്റ് കൂടി എഴുതപ്പെടുകയാണ്.
ഒരു മിനിമം ഗ്യാരന്റി സ്റ്റാർ ആയി മാറിയിരിക്കുകയാണ് ഇന്ന് ബേസില്‍ ജോസഫ്.
സാധാരണക്കാർക്ക് റിലേറ്റ് ചെയ്യാൻ കഴിയുന്ന കഥാപാത്രങ്ങളുമായി തമാശയുടെ മേമ്ബൊടിയുള്ള ഫാമിലി എന്റർടൈനർ സിനിമകളാണ് ബേസിലിന്റേതായി പുറത്തിറങ്ങുന്നവയില്‍ ഭൂരിഭാഗവും. ‘ജയ ജയ ജയ ജയ ഹേ’, ‘പൂക്കാലം’, ‘ഫാലിമി’, ‘വർഷങ്ങള്‍ക്ക് ശേഷം’, ‘ഗുരുവായൂരമ്ബല നടയില്‍’ തുടങ്ങിയവ ബോക്സ് ഓഫീസിലും പ്രേക്ഷകർക്കിടയിലും മികച്ച സ്വീകാര്യത നേടിയ ചിത്രങ്ങളാണ്. ഇതില്‍ ‘ഗുരുവായൂരമ്ബല നടയില്‍’ 100 കോടി ക്ലബ്ബിലെത്തിയ ചിത്രമായിരുന്നു.ബേസിലിന്റെ തിരക്കഥാ തെരഞ്ഞെടുപ്പുകളില്‍ ബ്ലോക്ക്ബസ്റ്ററുകള്‍ നല്‍കിയ ഒരു സംവിധായകന്റെ ബുദ്ധി കൂടി പ്രവർത്തിക്കുന്നുണ്ടെന്നാണ് പലരും ചൂണ്ടിക്കാണിക്കുന്നത്. തിയേറ്ററില്‍ എന്തായിരിക്കും പ്രതികരണം എന്ന് കൃത്യമായി കണക്കുകൂട്ടാൻ ബേസിലിന് കഴിയുമെന്ന് വരെ സിനിമാപ്രേമികള്‍ക്കിടയില്‍ അഭിപ്രായമുണ്ട്.
കഠിന കഠോരമീ അണ്ഡകടാഹവും അതിലെ ബച്ചു എന്ന കഥാപാത്രവുമാണ് ഈ ഴോണറില്‍ നിന്നും വ്യത്യസ്തമായിരുന്നത്. ഇമോഷണല്‍ ഡ്രാമയായ ചിത്രവും പക്ഷെ കുടുംബബന്ധങ്ങളും സാധാരണക്കാർ നേരിടുന്ന ജീവിത പ്രതിസന്ധികളും തന്നെയായിരുന്നു വിഷയമാക്കിയത്. ചിരിപ്പിക്കാൻ മാത്രമല്ല, നെഞ്ചില്‍ കൊളുത്തിവലിക്കുന്ന പ്രകടനം നടത്താനും തനിക്കറിയാം എന്ന ബേസില്‍ തെളിയിച്ച ചിത്രം കൂടിയായിരുന്നു കഠിന കഠോരമീ അണ്ഡകടാഹം. തിയേറ്റർക്കണക്കില്‍ മുൻപന്തിയിലില്ലെങ്കിലും നിരൂപകശ്രദ്ധയും മികച്ച അഭിപ്രായവും ഈ ചിത്രവും സ്വന്തമാക്കിയിരുന്നു.ആഗസ്റ്റ് 15 നാണ് ‘നുണക്കുഴി’ തിയേറ്ററുകളില്‍ എത്തിയത്. 1.65 കോടിയാണ് ചിത്രം ആദ്യ ദിനം കേരളത്തില്‍ നിന്ന് സ്വന്തമാക്കിയത്‍. എബി സക്കറിയ പൂഴിക്കുന്നേല്‍ എന്ന കഥാപാത്രത്തെയാണ് ബേസില്‍ ചിത്രത്തില്‍ അവതരിപ്പിച്ചത്. തന്റെ പേർസണല്‍ വീഡിയോ അടങ്ങിയ ലാപ്ടോപ്പ് ഇൻകം ടാക്സ് ഓഫീസറുടെ കയ്യില്‍ നിന്ന് നഷ്ടപ്പെടുന്നതും അത് തേടിയുള്ള എബിയുടെ യാത്രയും മണ്ടത്തരങ്ങളുമാണ് സിനിമയുടെ ഇതിവൃത്തം.
ജിസിസി മാർക്കറ്റിലും ചിത്രത്തിന് മികച്ച കളക്ഷൻ നേടാൻ സാധിക്കുന്നുണ്ട്. 5.79 കോടിയാണ് ചിത്രം ഇതുവരെ ജിസിസിയില്‍ നിന്ന് നേടിയതെന്നാണ് റിപ്പോർട്ടുകള്‍ സൂചിപ്പിക്കുന്നത്. ചിത്രത്തിന്റെ തിരക്കഥ ഒരുക്കിയത് കെ ആർ കൃഷ്ണകുമാർ ആണ്. ‘ട്വല്‍ത്ത് മാൻ’, ‘കൂമൻ’ എന്നീ ചിത്രങ്ങള്‍ക്ക് ശേഷം കൃഷ്ണകുമാർ – ജീത്തു ജോസഫ് കൂട്ടുകെട്ട് വീണ്ടുമൊന്നിച്ച ചിത്രമാണ് നുണക്കുഴി.
പൂർണമായും ഒരു കോമഡി പശ്ചാത്തലത്തിലുള്ള ചിത്രത്തില്‍ മികച്ച പ്രകടനമാണ് സിദ്ദിഖ്, ബൈജു, മനോജ് കെ ജയൻ എന്നിവർ കാഴ്ചവച്ചിരിക്കുന്നത്. അജു വർഗീസ്, സൈജു കുറുപ്പ്, അല്‍ത്താഫ് സലിം, ലെന, സ്വാസിക, ബിനു പപ്പു, അസീസ് നെടുമങ്ങാട് തുടങ്ങിയവരാണ് ചിത്രത്തിലെ വിവിധ കഥാപാത്രങ്ങളെ അവതരിപ്പിച്ചിരിക്കുന്നത്.