സംസ്ഥാനത്തെ 11, 12 ക്ലാസ്സുകളിലെ പാഠ്യപദ്ധതി പരിഷ്‌കരണ പ്രവർത്തനങ്ങളുടെ ഭാഗമായി പാഠപുസ്തക പരിഷ്‌കരണ നടപടികള്‍ ഈ മാസം ആരംഭിക്കുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി.
ശിവൻകുട്ടി പറഞ്ഞു. നിലവില്‍ എൻ.സി.ഇ.ആർ.ടി. തയ്യാറാക്കിയതും കേരള എസ്.സി.ഇ.ആർ.ടി. തയ്യാറാക്കിയതുമായ പാഠപുസ്തകങ്ങളാണ് ഹയർ സെക്കൻഡറിയില്‍ ഉപയോഗിക്കുന്നത്.
ഇതില്‍ എൻ.സി.ഇ.ആർ.ടി. പാഠപുസ്തകങ്ങള്‍ 2006 ലെ ദേശീയ പാഠ്യപദ്ധതി ചട്ടക്കൂട് പ്രകാരം തയ്യാറാക്കിയതാണ്. 2013 ല്‍ എസ്.സി.ഇ.ആർ.ടി. തയ്യാറാക്കിയ പാഠപുസ്തകങ്ങളും നിലവില്‍ ഉപയോഗിക്കുന്നു. ആദ്യഘട്ടം എസ്.സി.ഇ.ആർ.ടി. കേരളം തയ്യാറാക്കിയ പാഠപുസ്തകങ്ങളുടെ പരിഷ്‌കരണമാണ് നടക്കുക (ഭാഷാ വിഷയങ്ങള്‍, ഗാന്ധിയൻ സ്റ്റഡീസ്, ആന്ത്രോപോളജി, കമ്ബ്യൂട്ടർ സയൻസ് തുടങ്ങിയവ). ഹയർ സെക്കൻഡറി പാഠ്യപദ്ധതി പരിഷ്‌കാരങ്ങളുടെ തുടക്കം കുറിച്ച്‌ ഈ മാസം തന്നെ വിപുലമായ അക്കാദമിക ശില്‍പശാല എസ്.സി.ഇ.ആർ.ടി. യുടെ നേതൃത്വത്തില്‍ സംഘടിപ്പിക്കും. സംസ്ഥാനത്ത് ഹയർ സെക്കൻഡറി അധ്യാപകർക്ക് മേജർ വിഷയങ്ങള്‍ക്ക് നാല് ദിവസത്തെ പരിശീലനം പൂർത്തീകരിച്ചു കഴിഞ്ഞതായും മൈനർ വിഷയങ്ങളുടെ പരിശീലനം റസിഡൻഷ്യല്‍ രീതിയില്‍ ഇന്നു മുതല്‍ മൂന്ന് ദിവസം വരെ സംസ്ഥാനത്തെ വിവിധ കേന്ദ്രങ്ങളില്‍ ആരംഭിച്ചതായും മന്ത്രി പറഞ്ഞു. ഈ പരിശീലനം കൂടി അവസാനിച്ചാല്‍ ഈ വർഷം ഒന്നു മുതല്‍ 12-ാം ക്ലാസ്സ് വരെയുള്ള മുഴുവൻ അധ്യാപകർക്കും പൊതുവിദ്യാഭ്യാസ വകുപ്പിന്റെ നേതൃത്വത്തില്‍ പരിശീലനം നല്‍കിക്കഴിയും.
സംസ്ഥാനത്തിന്റെ ചരിത്രത്തില്‍ തന്നെ ആദ്യമായാണ് ഇത്തരത്തില്‍ അക്കാദമിക വർഷാരംഭത്തില്‍ തന്നെ പരിശീലനങ്ങള്‍ പൂർത്തീകരിക്കാൻ കഴിയുന്നതെന്ന് മന്ത്രി ചൂണ്ടിക്കാട്ടി.
2024- 25 അധ്യയന വർഷം ഒന്നു മുതല്‍ പത്തു വരെ ക്ലാസുകളിലെ ക്ലസ്റ്റർ അധ്യാപക പരിശീലനം പൊതുവിദ്യാഭ്യാസ വകുപ്പിന്റെ ആഭിമുഖ്യത്തില്‍ എസ്.സി.ഇ.ആർ.ടി, സമഗ്ര ശിക്ഷാ കേരളം, ഡയറ്റ് എന്നീ വിദ്യാഭ്യാസ ഏജൻസികളുടെ സംയോജിച്ച പ്രവർത്തനങ്ങളിലൂടെ 2024 ജൂണ്‍ 29 ന് സംസ്ഥാനത്ത് സംഘടിപ്പിച്ചു. വിവിധ ക്ലാസുകളിലെ വിവിധ വിഷയങ്ങളുടെ ക്ലസ്റ്റർ മൊഡ്യൂള്‍ തയ്യാറാക്കുന്നതിനായി ഡയറ്റുകളുടെയും സമഗ്ര ശിക്ഷാ കേരളം ബി.ആർ.സികളുടേയും നേതൃത്വത്തില്‍ വിദ്യാലയങ്ങള്‍ സന്ദർശിച്ച്‌ അധ്യാപകർക്ക് അവധിക്കാല അധ്യാപക പരിശീലനത്തില്‍ പരിചയപ്പെടുത്തിയ ക്ലാസ്‌റൂം പ്രവർത്തനങ്ങള്‍ക്ക് അധിക പിന്തുണ ആവശ്യമായ മേഖലകള്‍ തിരിച്ചറിഞ്ഞ് ഉള്‍പ്പെടുത്തിയിരുന്നു. കൂടാതെ 2024 ദേശീയ തല സർവ്വേയില്‍ (നാസ്) ഉള്‍പ്പെടുന്ന ചോദ്യങ്ങള്‍ പരിചയപ്പെടുത്തുന്നതിനും ജൂലായ് മാസത്തിലെ ക്ലാസ് റൂം പ്രവർത്തനങ്ങളുടെ ആസൂത്രണ സെഷനും ക്ലസ്റ്റർ അധ്യാപക പരിശീലന മൊഡ്യൂളില്‍ ഉള്‍പ്പെടുത്തിയിരുന്നു.
2024- 25 അധ്യയന വർഷം 5 ദിവസത്തെ അവധിക്കാല അധ്യാപക പരിശീലനത്തെ തുടർന്ന് 6 ക്ലസ്റ്റർ അധ്യാപക സംഗമങ്ങളാണ് വിവിധ മേഖലകളെ അടിസ്ഥാനപ്പെടുത്തി അധ്യാപകരെ ശാക്തികരിക്കുന്നതിന് പൊതുവിദ്യാഭ്യാസ വകുപ്പ് തീരുമാനിച്ചിട്ടുള്ളത്. ഇതിൻ പ്രകാരം 2024 ജൂലായ് 20 നാണ് രണ്ടാമത്തെ ക്ലസ്റ്റർ അധ്യാപക യോഗം നിശ്ചയിച്ചിട്ടുള്ളത്. പൊതുവിദ്യാഭ്യാസ വകുപ്പിന്റെ ആഭിമുഖ്യത്തില്‍ സമഗ്ര ശിക്ഷാ കേരളം – സ്റ്റാർസ് പദ്ധതി മുഖേന 2024- 25 വർഷത്തെ അവധിക്കാല അധ്യാപക സംഗമം സംഘടിപ്പിച്ചു. എല്‍.പി, യു.പി, ഹൈസ്‌കൂള്‍ വിഭാഗങ്ങളിലെ സംസ്ഥാനത്തെ മുഴുവൻ അധ്യാപകർക്കുമുള്ള പരിശീലനം 2024 മെയ് 14 മുതല്‍ മെയ് 25 വരെ തീയതികളില്‍ രണ്ട് ഘട്ടങ്ങളിലായാണ് സംഘടിപ്പിച്ചത്.