2034 ഫിഫ ലോകകപ്പിന് ആതിഥേയത്വം വഹിക്കാൻ തെരഞ്ഞെടുക്കപ്പെട്ട സൗദി അറേബ്യക്ക് അഭിനന്ദന പ്രവാഹം. ലോക രാഷ്ട്രത്തലവന്മാർ അഭിനന്ദനങ്ങള്‍ കൊണ്ട് പൊതിഞ്ഞു.
ഏറ്റവും വലിയ ആഗോള ഇവന്റിന് ആതിഥേയത്വം വഹിക്കാൻ സൗദിയെ തെരഞ്ഞെടുത്തത് ഉയർന്ന അന്തർദേശീയ പദവിയെ പ്രതിഫലിപ്പിക്കുന്നതാണെന്ന് വിവിധ രാജ്യങ്ങളുടെ ഭരണതലവന്മാൻ അഭിപ്രായപ്പെട്ടു.
സല്‍മാൻ രാജാവിനും കിരീടാവകാശി അമീർ മുഹമ്മദ് ബിൻ സല്‍മാനും അവർ അഭിനന്ദങ്ങള്‍ നേർന്നു. ഈ ആഗോള കായികമേളക്ക് നേതൃത്വം നല്‍കാനുള്ള അവസരത്തിനായി സൗദി അറേബ്യ നിരന്തരം നടത്തിയ മികച്ച ശ്രമങ്ങളെ ഒമാൻ സുല്‍ത്താൻ ഹൈതം ബിൻ ത്വാരിഖ് പ്രശംസിച്ചു. കായിക രംഗത്ത് പ്രത്യേകിച്ചും പൊതുവെ എല്ലാ വികസന മേഖലകളിലും കൂടുതല്‍ നേട്ടങ്ങളും വിജയവും കൈവരിക്കട്ടെയെന്ന് അദ്ദേഹം ആശംസിച്ചു.
അന്താരാഷ്ട്ര കായിക മാമാങ്കത്തിന് ആതിഥേയത്വം വഹിക്കാൻ സൗദി തെരഞ്ഞെടുക്കപ്പെട്ടത് ആ രാജ്യത്തിനുള്ള ഉയർന്ന അന്താരാഷ്ട്ര നിലവാരത്തെയും അത്തരം അന്താരാഷ്ട്ര ഇവൻറുകള്‍ സംഘടിപ്പിക്കുന്നതിനുള്ള വിപുലമായ ശേഷിയെയും അനുഭവസമ്ബത്തിനെയും ആത്മവിശ്വാസത്തെയും പ്രതിഫലിപ്പിക്കുന്നുവെന്ന് അഭിനന്ദന സന്ദേശത്തില്‍ കുവൈത്ത് അമീർ ശൈഖ് മിശ്അല്‍ അല്‍അഹമ്മദ് അല്‍ജാബർ അല്‍സബാഹ് പറഞ്ഞു. ഇത് അഭിമാനകരമായ നേട്ടമാണ്. അർഹതക്കുള്ള ബഹുമതിയാണ്. ഈ വിശിഷ്ട നേട്ടം ഗള്‍ഫ് രാജ്യങ്ങള്‍ക്കും എല്ലാ സഹോദര സൗഹൃദ അറബ്, ഇസ്ലാമിക രാജ്യങ്ങള്‍ക്കും അഭിമാനമാണ്. ഈ പ്രധാന അന്താരാഷ്ട്ര കായികമേളക്ക് ആതിഥേയത്വം വഹിക്കുന്ന സൗദി അറേബ്യക്ക് വിജയം നേരുന്നു. ഭരണാധികാരികള്‍ക്ക് നല്ല ആരോഗ്യവും ക്ഷേമവും ആശംസിക്കുന്നു. രാജ്യത്തിന് എല്ലാ ഔന്നത്യവും കൂടുതല്‍ സമൃദ്ധിയും നേരുന്നുവെന്നും കുവൈത്ത് അമീർ സന്ദേശത്തില്‍ പറഞ്ഞു.
ഖത്തർ അമീർ ശൈഖ് തമീം ബിൻ ഹമദ് അല്‍താനിയും ജോർഡൻ രാജാവ് അബ്ദുല്ല രണ്ടാമനും സല്‍മാൻ രാജാവിനെയും കിരീടാവകാശിയെയും അഭിനന്ദിച്ചു. ഈ പ്രധാന ആഗോള ഇവന്റിന് സൗദി ആതിഥേയത്വം വഹിക്കുന്നത് ജോർഡനും മറ്റെല്ലാ അറബ് രാജ്യങ്ങള്‍ക്കും അഭിമാനമാണെന്ന് അബ്ദുല്ല രണ്ടാമൻ രാജാവ് പറഞ്ഞു. സൗദി അലങ്കരിക്കുന്ന വിശിഷ്ട പദവിയുടെ സാക്ഷ്യമാണിത്. ലോകകപ്പിനുള്ള ആതിഥേയത്വം വിജയകരമാക്കുന്നതില്‍ കിരീടാവകാശി നടത്തിയ ശ്രമങ്ങളെ അഭിനന്ദിക്കുന്നുവെന്നും ജോർഡൻ രാജാവ് സന്ദേശത്തില്‍ പറഞ്ഞു.
അറബ് പാർലമെൻറ് സ്പീക്കർ മുഹമ്മദ് അഹമ്മദ് അല്‍ യമാഹിയും ഊഷ്മളമായ അഭിനന്ദനങ്ങളും ആംശസകളും നേർന്നു. ലോകകപ്പിന് ആതിഥേയത്വം വഹിക്കാനുള്ള വിജയം ഒരു അറബ് വിജയത്തെ പ്രതിനിധീകരിക്കുന്നുവെന്ന് അറബ് പാർലമെൻറ് സ്പീക്കർ പറഞ്ഞു. അന്താരാഷ്ട്ര രംഗത്ത് സൗദി കൈക്കൊള്ളുന്ന സുപ്രധാന സ്ഥാനവും പ്രധാന ആഗോള ഇവൻറുകള്‍, പ്രത്യേകിച്ച്‌ കായിക മേഖലയില്‍ ആതിഥേയത്വം വഹിക്കുന്നതില്‍ ആ രാജ്യത്തിനുള്ള പ്രധാന പങ്കും പ്രതിഫലിപ്പിക്കുന്നു. ഈ ആഗോള ഇവൻറ് കാര്യക്ഷമമായും സമർഥമായും നടത്തുന്നതിനും മാന്യമായ രീതിയില്‍ സംഘടിപ്പിക്കുന്നതിനും സൗദി അറേബ്യയുടെ കഴിവിലും സന്നദ്ധതയിലും അല്‍യമാഹി പൂർണ ആത്മവിശ്വാസം പ്രകടിപ്പിച്ചു. ഈ രംഗത്ത് സൗദി ആസ്വദിക്കുന്ന മഹത്തായ കഴിവുകളെ പ്രശംസിക്കുന്നുവെന്നും അല്‍യമാഹി പറഞ്ഞു.
2034 ഫിഫ ലോകകപ്പിന് ആതിഥേയത്വം വഹിക്കാൻ സൗദിയെ തെരഞ്ഞെടുത്തത് അഭിമാനകരമായ അന്താരാഷ്ട്ര പദവിയെ പ്രതിഫലിപ്പിക്കുന്നുവെന്ന് ജി.സി.സി സെക്രട്ടറി ജനറല്‍ ജാസിം മുഹമ്മദ് അല്‍ ബുദൈവി പറഞ്ഞു. പ്രധാന കായിക മത്സരങ്ങള്‍ സംഘടിപ്പിക്കുന്നതിലെ അസാധാരണമായ കഴിവ്, തന്ത്രപരമായ ആസൂത്രണത്തിലെ മികവ്, ഏറ്റവും പ്രധാനപ്പെട്ട ആഗോള ഇവൻറുകള്‍ക്ക് ആതിഥേയത്വം വഹിക്കുന്നതിനുള്ള അതിമോഹമായ ഭാവി കാഴ്ചപ്പാട് എന്നിവ പ്രതിഫലിപ്പിക്കുന്നുവെന്നും അല്‍ബുദൈവി പറഞ്ഞു.