അടിക്കടി വര്‍ഗീയ പരാമർശങ്ങള്‍ നടത്തുന്ന അസം മുഖ്യമന്ത്രി ഹിമന്ത ബിശ്വശർമക്കെതിരെ പ്രതിപക്ഷ പാർട്ടികള്‍ രംഗത്ത്.
മിയ മുസ്‌ലിംകളെ സംസ്ഥാനത്തേക്ക് അനുവദിക്കില്ലെന്ന മുഖ്യമന്ത്രിയുടെ ഏറ്റവും ഒടുവിലത്തെ പ്രസ്താവനക്കെതിരെയാണ് പ്രതിപക്ഷം രംഗത്ത് എത്തിയത്.
പ്രതിപക്ഷ കൂട്ടായ്മയായ യുനൈറ്റഡ് പ്രതിപക്ഷ ഫോറം (യുഒഎഫ്‌എ) ജനറല്‍ സെക്രട്ടറി ലുറിൻജ്യോതി ഗൊഗോയ് ആണ് ദിസ്പൂര്‍ പൊലീസില്‍ നല്‍കിയത്. ഫോറത്തിലെ മറ്റ് പാർട്ടി നേതാക്കളും ഗൊഗോയ്‌ക്കൊപ്പമുണ്ടായിരുന്നു. ഇന്‍ഡ്യ സഖ്യവുമായി സഹകരിക്കുന്ന അസമിലെ 18 പ്രതിപക്ഷ പാർട്ടികളുടെ ഫോറമാണ് യുഒഎഫ്‌എ.
സമുദായങ്ങള്‍ക്കിടയില്‍ വിദ്വേഷം പ്രോത്സാഹിപ്പിക്കുന്നുവെന്ന് ചൂണ്ടിക്കാട്ടിയാണ് മുഖ്യമന്ത്രിക്കെതിരെ പൊലീസില്‍ പരാതി നല്‍കിയത്. അതേസമയം പരാതി കൊടുത്തെങ്കിലും ഇതുവരെ കേസ് എടുത്തിട്ടില്ല.
” അസമിലെ 18 പ്രതിപക്ഷ പാർട്ടികളാണ് മുഖ്യമന്ത്രിക്കെതിരെ സംയുക്തമായി പരാതി നല്‍കിയത്. ലോക്‌സഭാ തെരഞ്ഞെടുപ്പു ഫലം വന്നതു മുതല്‍ അസം മുഖ്യമന്ത്രി സഭയ്ക്കുള്ളില്‍ പോലും വർഗീയ കലാപം സൃഷ്ടിക്കാനും വിദ്വേഷ പ്രസ്താവനകള്‍ നടത്താനും ശ്രമിക്കുകയാണ്. ഇക്കാര്യം ചൂണ്ടിക്കാട്ടി ഞങ്ങള്‍ രാഷ്ട്രപതിക്കും കത്തെഴുതും”- അസം കോണ്‍ഗ്രസ് അധ്യക്ഷൻ ഭൂപെൻ ബോറ പറഞ്ഞു.
നാഗോണില്‍ 14 വയസുകാരിയെ ബലാത്സംഗം ചെയ്ത സംഭവവും സംസ്ഥാനത്തെ ക്രമസമാധാന പ്രശ്‌നവും ചർച്ചയ്ക്ക് വന്നപ്പോഴാണ് ശർമ്മ വിവാദ പ്രസ്താവന നടത്തിയത്. സംഭവത്തെ വർഗീയവല്‍ക്കരിക്കാനാണ് അദ്ദേഹം ശ്രമിച്ചത്. അതേസമയം മുഖ്യമന്ത്രിയുടെ പരാമര്‍ശത്തോടെ ബി.ജെ.പി പ്രവർത്തകരും നേതാക്കളും ചേർന്ന് ശിവസാഗറില്‍ മതന്യൂനപക്ഷ വിഭാഗത്തില്‍പ്പെട്ടവര്‍ക്ക് നേരെ ആക്രമണം നടത്തിയതായി പ്രതിപക്ഷ പാർട്ടികള്‍ പറഞ്ഞു.
സംസ്ഥാനത്ത് കലാപ സാഹചര്യം സൃഷ്ടിക്കാനുള്ള ഗൂഢാലോചനയുടെ ഭാഗമായാണ് ഇതെല്ലാമെന്നും മുഖ്യമന്ത്രിയും മറ്റു ബി.ജെ.പി നേതാക്കളുമാണ് ഉത്തരവാദികളെന്നും പ്രതിപക്ഷം ആരോപിച്ചു.
ഒരു പ്രത്യേക സമുദായത്തിനെതിരെ പ്രകോപനപരമായ പ്രസ്താവനകള്‍ നടത്തിയ ചരിത്രമാണ് മുഖ്യമന്ത്രിക്കുള്ളത്. ഒരു വർഷം മുമ്ബാണ് ഗുവാഹത്തിയില്‍ നിന്ന് ‘മിയ’ എന്ന് വിളിക്കുന്ന മുസ് ലിംകളെ ഒഴിപ്പിക്കാൻ പൊതുജനങ്ങളോട് അഭ്യർത്ഥിച്ചത്- പ്രതിപക്ഷം ചൂണ്ടിക്കാട്ടി. സമാനമായി അടുത്ത കാലത്ത് മുഖ്യമന്ത്രി നടത്തിയ വര്‍ഗീയ പരാമര്‍ശങ്ങളും പ്രതിപക്ഷം എടുത്തുകാണിച്ചു. അടുത്തിടെയാണ് ഒരു മാധ്യമപ്രവര്‍ത്തകന്റെ പേര് ചോദിച്ച്‌ വിദ്വേഷം ചൊരിഞ്ഞത്. പ്രളയ ജിഹാദ്, മുസ്‌ലിം കുടിയേറ്റം തുടങ്ങി അടിക്കടി വിദ്വേഷ പരാമർശങ്ങളാണ് മുഖ്യമന്ത്രി നടത്തുന്നത്. ഇക്കാര്യങ്ങളൊക്കെ ചൂണ്ടിക്കാട്ടിയാണ് ഇപ്പോള്‍ പ്രതിപക്ഷം പരാതിയുമായി രംഗത്ത് എത്തിയത്.