ലഹരിക്കടത്ത് തടയുന്നതിനുള്ള പൊലീസിന്റെ സ്‌പെഷല്‍ ഡ്രൈവില്‍ രണ്ടിടങ്ങളിലായി കഞ്ചാവുമായി രണ്ട് യുവാക്കളെ പിടികൂടി.
302 ഗ്രാം കഞ്ചാവുമായി കോഴിക്കോട് അരിക്കുളം ചെടപ്പള്ളി മീത്തല്‍ വീട്ടില്‍ സി.എം. വിനോദ് (41), 20.58 ഗ്രാം കഞ്ചാവുമായി വടുവഞ്ചാല്‍ തോമാട്ടുച്ചാല്‍ നിരപ്പില്‍ വീട്ടില്‍ അനീഷ് ദേവസ്യ (39) എന്നിവരെയാണ് പിടികൂടിയത്.
ഞായറാഴ്ച രാത്രിയോടെ പുല്‍പള്ളി മരക്കടവിലാണ് വിനോദ് പിടിയിലാകുന്നത്. ഉച്ചയോടെ ബത്തേരി കെ.എസ്.ആര്‍.ടിസി ഗാരേജിന് സമീപത്ത് നിന്നാണ് അനീഷ് ദേവസ്യ വലയിലാകുന്നത്. ജില്ല പൊലീസ് ലഹരി വിരുദ്ധ സ്‌ക്വാഡ്, ഡോഗ് സ്‌ക്വാഡ്, എക്‌സൈസ് എന്നിവയുടെ സംയുക്ത പരിശോധനയില്‍ വലിയ അളവില്‍ എം.ഡി.എം.എയും പിടിച്ചെടുത്തു. ബംഗളൂരുവില്‍നിന്ന് വരുകയായിരുന്ന സ്വകാര്യ ബസില്‍നിന്ന് കല്‍പറ്റ ജനമൈത്രി ജങ്ഷനില്‍ നടത്തിയ പരിശോധനയിലാണ് 172.37 ഗ്രാം എം.ഡി.എം.എ പിടിച്ചെടുത്തത്. ബസിലെ യാത്രക്കാരനായ മലപ്പുറം വെള്ളുവങ്ങാട് മഞ്ചേരി വീട്ടില്‍ എം. ഷംനാസിനെ (33) എക്‌സൈസ് അറസ്റ്റ് ചെയ്തു. തിങ്കളാഴ്ച പുലര്‍ച്ചയായിരുന്നു പരിശോധന.