ഒരു കൈ കൊടുക്കാന്‍ പോയതിന്റെ ട്രോളുകള്‍ ബേസില്‍ ജോസഫിനെ ഇപ്പോഴും വിട്ട് പോയിട്ടില്ല. അബദ്ധങ്ങളുടെ തുടക്കം ടോവിനോ തോമസ് ആയിരുന്നുവെങ്കിലും കൈകൊടുക്കല്‍ യൂണിവേഴ്‌സിന് തുടക്കമിട്ടത് ബേസില്‍ ജോസഫ് ആണ്.
പിന്നാലെ, സുരാജ് വെഞ്ഞാറമൂട്, ബോളിവുഡ് താരം അക്ഷയ് കുമാർ, രമ്യ നമ്ബീശൻ എന്നിവരും കൈ കൊടുക്കാൻ പോയി ചമ്മിയിരുന്നു. ഈ ലിസ്റ്റില്‍ പുതിയ അഡ്മിഷൻ. മെഗാ അഡ്മിഷൻ ആണ് ഇത്തവണ. മമ്മൂട്ടിയാണ് പുതിയ ആള്‍.
അക്ഷയ് കുമാറിനെ പറ്റിച്ചത് മോഹൻലാല്‍ ആണെങ്കില്‍, ഇവിടെ മമ്മൂട്ടിയെ പറ്റിച്ചത് ഒരു ചെറിയ കുട്ടിയാണ്. കുട്ടിയെ കണ്ടപ്പോള്‍ മമ്മൂട്ടി ഷെയ്ഖ് ഹാൻഡ് നല്‍കാൻ കൈ നീട്ടി. കുട്ടി ഇത് ശ്രദ്ധിക്കാതെ മമ്മൂട്ടിക്ക് അടുത്ത് നിന്ന ആള്‍ക്ക് ഷെയ്ക്ക് ഹാൻഡ് നല്‍കി. ചുറ്റിനുമുള്ളവർ കുട്ടിയെ കൊണ്ട് പിന്നീട് മമ്മൂട്ടിക്ക് ഷെയ്ക്ക് ഹാൻഡ് നല്‍കുകയായിരുന്നു. ഇതിന്റെ വീഡിയോ സോഷ്യല്‍ മീഡിയയില്‍ വൈറലാകുന്നു.
ഇതേ അബദ്ധം നടന്‍ സുരാജ് വെഞ്ഞാറമൂടിനും സംഭവിച്ചിരുന്നു. ഈ ക്ലബ്ബിലേക്ക് അടുത്തിടെയാണ് അക്ഷയ് കുമാർ എത്തിയത്. ബറോസിന്റെ ചടങ്ങില്‍ അതിഥിയായി എത്തിയ അക്ഷയ് കുമാർ, മോഹൻലാലിനെ സ്റ്റേജിലേക്ക് കയറാൻ കൈ നല്‍കിയിരുന്നു. എന്നാല്‍, മോഹൻലാല്‍ ഇത് കണ്ടില്ല. അക്ഷയ് കുമാർ ചിരിക്കുന്നതിന്റെ വീഡിയോ വൈറലാവുകയും ചെയ്തു.
ഈ ലിസ്റ്റില്‍ കഴിഞ്ഞ ദിവസം അഡ്മിഷൻ എടുത്തത് നടി രമ്യ നമ്ബീശൻ ആണ്. ലിസ്റ്റില്‍ ആദ്യത്തെ സ്ത്രീ മത്സരാർത്ഥിയാണ് ഇവർ എന്നാണ് സോഷ്യല്‍ മീഡിയയുടെ ട്രോള്‍. ഭാവനയും രമ്യ നമ്ബീശനും പങ്കെടുത്ത ഒരു പരിപാടിയില്‍ നിന്നുള്ള വീഡിയോയാണ് വൈറലായത്. കൈ കൊടുക്കാന്‍ ശ്രമിക്കുന്ന രമ്യയെ അത് കാണാതെ പോവുന്ന ഒരു ക്രിക്കറ്റ് പ്ലെയറുമാണ് വീഡിയോയില്‍. നിരവധി കമന്റുകളാണ് വീഡിയോക്ക് ലഭിക്കുന്നത്.