ഫലസ്തീനിലും ലബനാനിലും ഇസ്രായേല്‍ ആക്രമണം തുടരുന്നതിനെക്കുറിച്ച്‌ ചർച്ച ചെയ്യാൻ സംയുക്ത അറബ്-ഇസ്‌ലാമിക് ഫോളോഅപ് ഉച്ചകോടിക്ക് ആഹ്വാനം ചെയ്ത സൗദി അറേബ്യയുടെ മുൻകൈയെ ഇറാൻ പ്രസിഡൻറ് മസൂദ് പെസെഷ്കിയൻ പ്രശംസിച്ചു.
കിരീടാവകാശി അമീർ മുഹമ്മദ് ബിൻ സല്‍മാനുമായി ടെലിഫോണ്‍ സംഭാഷണം നടത്തവേയാണ് പ്രശംസ. ഉച്ചകോടി വിജയകരമാകട്ടെയെന്ന് അദ്ദേഹം ആശംസിച്ചു. ഇരുരാജ്യങ്ങളും തമ്മിലുള്ള ബന്ധത്തിന്റെ വികാസവും അവ ശക്തിപ്പെടുത്തുന്നതിനുള്ള വഴികളും ഇരുവരും ചർച്ച ചെയ്തു.
ഇതിനിടെ സൗദി സായുധ സേന ചീഫ് ഓഫ് ജനറല്‍ സ്റ്റാഫ് ലെഫ്റ്റനന്റ് ജനറല്‍ ഫയാദ് ബിൻ ഹാമിദ് അല്‍ റുവൈലി ഇറാൻ സായുധസേനയുടെ ജനറല്‍ സ്റ്റാഫ് മേധാവി മേജർ ജനറല്‍ മുഹമ്മദ് ബാഗരിയുമായി കൂടിക്കാഴ്ച നടത്തി. ഇറാൻ സന്ദർശനത്തിടെ തെഹ്‌റാനില്‍വെച്ചാണ് ഇരുവരും നേരില്‍കണ്ടത്.
മേഖലയില്‍ സുരക്ഷയും സുസ്ഥിരതയും വർധിപ്പിക്കുന്ന തരത്തില്‍ സൈനിക, പ്രതിരോധ മേഖലകളില്‍ ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം വികസിപ്പിക്കുന്നതിനുള്ള അവസരങ്ങളും പൊതുതാല്‍പര്യമുള്ള വിഷയങ്ങളും ചർച്ച ചെയ്തു.
ബെയ്ജിങ് കരാറിന്റെ ചട്ടക്കൂടിനുള്ളിലാണ് ലെഫ്റ്റനന്റ് ജനറല്‍ ഫയാദ് അല്‍ റുവൈലിയുടെ ഇറാൻ സന്ദർശനം. ഇരു രാജ്യങ്ങളും തമ്മിലുള്ള പൊതുതാല്‍പര്യമുള്ള വിഷയങ്ങളില്‍ നേട്ടമുണ്ടാക്കാൻ പരസ്പര സഹകരണമുണ്ടാക്കുകയും ഏകോപനവും സഹകരണവും ഉന്നത നിലവാരത്തില്‍ ശക്തിപ്പെടുത്തുകയും ചെയ്യുകയാണ് ലക്ഷ്യം.
ഇറാൻ ഇന്റലിജൻസ് ആൻഡ് സെക്യൂരിറ്റി അഫയേഴ്‌സ് അസിസ്റ്റൻറ് ചീഫ് ഓഫ് സ്റ്റാഫ് മേജർ ജനറല്‍ ഗുലാം മിഹ്റാബിയുമായും അല്‍റുവൈലി കൂടിക്കാഴ്ച നടത്തി.