പ്രധാനമന്ത്രി നരേന്ദ്ര മോദി അടുത്ത മാസം യുക്രൈൻ സന്ദർശിക്കും. 2022ല്‍ റഷ്യ-യുക്രൈൻ യുദ്ധം തുടങ്ങിയ ശേഷം ആദ്യമായാണ് മോദി യുക്രൈനിലെത്തുന്നത്.
ഒരു മാസം മുമ്ബ് ഇറ്റലിയില്‍ നടന്ന ജി7 ഉച്ചകോടിയില്‍ മോദി സെലൻസ്‌കിയുമായി കൂടിക്കാഴ്ച നടത്തിയിരുന്നു. മൂന്നാം തവണയും പ്രധാനമന്ത്രിയായി തിരഞ്ഞെടുക്കപ്പെട്ട മോദിയെ അഭിനന്ദിച്ച സെലൻസ്‌കി അദ്ദേഹത്തെ യുക്രൈൻ സന്ദർശിക്കാൻ ക്ഷണിച്ചിരുന്നു.
ഈ വർഷം മാർച്ചില്‍ സെലൻസ്‌കിയുമായി ഫോണില്‍ സംസാരിച്ച മോദി ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നത് സംബന്ധിച്ച്‌ ചർച്ച നടത്തിയിരുന്നു. നിലവിലുള്ള സംഘർഷം നയതന്ത്ര ചർച്ചകളിലൂടെ പരിഹരിക്കണമെന്നും മോദി ആവശ്യപ്പെട്ടിരുന്നു.
ഈ മാസം ആദ്യത്തില്‍ രണ്ട് ദിവസത്തെ സന്ദർശനത്തിനായി മോദി റഷ്യയിലെത്തിയിരുന്നു. യുദ്ധത്തിലൂടെ ഒരു പ്രശ്‌നത്തിനും പരിഹാരം കാണാനാവില്ലെന്ന് പുടിനുമായുള്ള ചർച്ചയിലും മോദി പറഞ്ഞിരുന്നു. നയതന്ത്ര ചർച്ചകളിലൂടെ തർക്കങ്ങള്‍ പരിഹരിക്കണമെന്നും അതിന് സാധ്യമായതെല്ലാം ചെയ്യാൻ ഇന്ത്യ സന്നദ്ധമാണെന്നും അദ്ദേഹം പുടിനെ അറിയിച്ചിരുന്നു.