തലച്ചോറിന്റെ പ്രവർത്തനങ്ങള്‍ മെച്ചപ്പെടുത്തുന്നതില്‍ നമ്മള്‍ കഴിക്കുന്ന ആഹാരം നിർണായക പങ്കുവഹിക്കുന്നുണ്ട്.
ഓർമ്മശക്തി, ശ്രദ്ധ എന്നിങ്ങനെയുള്ള ബുദ്ധിപരമായ കഴിവുകള്‍ മെച്ചപ്പെടുത്തുന്നതിന് ചില അവശ്യപോഷകങ്ങള്‍ അടങ്ങിയ ഭക്ഷണങ്ങള്‍ ഉള്‍പ്പെടുത്തേണ്ടതുണ്ട്. അവ ഏതൊക്കെയാണെന്ന് നോക്കാം
- വാള്‍നട്ട്
ഒമേഗ 3, ഫാറ്റി ആസിഡുകള്‍, ആന്റി ഓക്സിഡന്റുകള്‍, വിറ്റാമിൻ ഇ എന്നിവയുടെ ശക്തികേന്ദ്രമാണ് വാള്‍നട്ട്. സമ്മർദ്ദവും വീക്കവും കുറയ്‌ക്കാനും ഓർമ്മശക്തി വർദ്ധിപ്പിക്കാനും സഹായിക്കുന്ന പോഷക ഘടകങ്ങള്‍ ആണിവ.
- മഞ്ഞള്‍
മഞ്ഞളില്‍ അടങ്ങിയിരിക്കുന്ന കുർകുമിൻ വളരെ നല്ലൊരു ആന്റി ഓക്സിഡന്റും ആന്റി-ഇൻഫ്ളമേറ്ററി സംയുക്തവുമാണ്. ഇവ വിഷാദ രോഗത്തിന്റെ ലക്ഷണങ്ങള്‍ ഇല്ലാതാക്കുന്നു. ന്യൂറോജെനസിസ് വഴി പുതിയ മസ്തിഷ്ക കോശങ്ങളുടെ വളർച്ചയെ ഇത് പ്രോത്സാഹിപ്പിക്കും.
- ഓറഞ്ച്
ഓറഞ്ചില്‍ വിറ്റാമിൻ സി ധാരാളമടങ്ങിയിട്ടുണ്ട്. ഇത് ഫ്രീ റാഡിക്കലുകളില്‍ നിന്നും തലച്ചോറിനെ സംരക്ഷിക്കുന്ന ഒരു ആന്റി ഓക്സിഡന്റാണ്. മാനസികാവസ്ഥ മെച്ചപ്പെടുത്തുകയും ഓർമ്മ ശക്തി വർധിപ്പിക്കുകയും ചെയ്യുന്ന ന്യൂറോ ട്രാൻസ്മിറ്ററുകളുടെ നിർമ്മാണത്തിലും വിറ്റാമിൻ സി പ്രധാന പങ്കുവഹിക്കുന്നു.
- ബ്രോക്കോളി
വൈറ്റമിൻ കെ യുടെ സമ്ബന്നമായ ഉറവിടമാണ് ബ്രോക്കോളി. ഇത് ബുദ്ധിശക്തിയെ മെച്ചപ്പെടുത്തുകയും ഒപ്പം തലച്ചോറിന്റെ ആരോഗ്യത്തിന് സഹായിക്കുകയും ചെയ്യുന്നു. ഫ്രീ റാഡിക്കലുകളില്‍ നിന്നുണ്ടാകുന്ന പ്രശ്ങ്ങളില്‍ നിന്നും തലച്ചോറിനെ സംരക്ഷിക്കുന്ന ആന്റി ഓക്സിഡന്റുകളും ആന്റി-ഇൻഫ്ളമേറ്ററി സംയുക്തങ്ങളും ഇതില്‍ അടങ്ങിയിട്ടുണ്ട്.
- ഡാർക്ക് ചോക്ലേറ്റ്
ഡാർക്ക് ചോക്ലേറ്റില്‍ ഫ്ളേവനോയിഡുകള്‍, കഫീൻ, ആന്റി ഓക്സിഡന്റുകള്‍ എന്നിവ അടങ്ങിയിട്ടുണ്ട്. ഫ്ളേവനോയിഡുകള്‍ തലച്ചോറിലേക്കുള്ള രക്തപ്രവാഹത്തെ ഉത്തേജിപ്പിക്കുന്നു. ഓർമശക്തി, ശ്രദ്ധ, പഠനം എന്നിവയ്‌ക്ക് ഇത് സഹായിക്കുന്നു. ഇതില്‍ മിതമായ അളവില്‍ അടങ്ങിയിരിക്കുന്ന കഫീൻ ശരീരത്തിനാവശ്യമായ ഊർജ്ജവും പ്രദാനം ചെയ്യുന്നു.
- കൊഴുപ്പുള്ള മത്സ്യങ്ങള്‍
സാല്‍മണ്‍ പോലെ കൊഴുപ്പുള്ള മത്സ്യങ്ങള്‍ ഒമേഗാ 3 ഫാറ്റി ആസിഡുകളാല്‍ സമ്ബന്നമാണ്. ഇവയില്‍ അടങ്ങിയിരിക്കുന്ന ആരോഗ്യകരമായ കൊഴുപ്പ് മസ്തിഷ കോശങ്ങളുടെ സ്തരങ്ങള്‍ നിർമിക്കുന്നതിനും ന്യൂറോണുകള്‍ തമ്മിലുള്ള ആശയവിനിമയം പ്രോത്സാഹിപ്പിക്കുന്നതിനും അത്യാവശ്യമാണ്.
- മുട്ട
മുട്ടകളില്‍ ധാരാളമായി അടങ്ങിയിരിക്കുന്ന കോളിൻ തലച്ചോറിന്റെ ആരോഗ്യത്തില്‍ നിർണായക പങ്കുവഹിക്കുന്നു. ഇവ ഉത്പാദിപ്പിക്കുന്ന അസറ്റൈല്‍കോളിൻ ബുദ്ധിശക്തിയെയും മനസികാവസ്ഥയെയും നിയന്ത്രിക്കുന്ന ന്യൂറോട്രാൻസ്മിറ്ററാണ്. വിറ്റാമിൻ B6, B12, ഫോളേറ്റ് എന്നീ പോഷകങ്ങളും മുട്ടയിലുണ്ട്.