ചരിത്രപരമായി ഏറെ സവിശേഷതകളുള്ള സ്മാരകമാണ് താജ്മഹല്‍. ദിനംപ്രതി ഇവിടം സന്ദർശിക്കുന്നത് നിരവധി പേരാണ്.
ഇപ്പോള്‍ താജ്മഹലില്‍ ജലാഭിഷേകം നടത്തിയ യുവതിയെ കസ്റ്റഡിയിലെടുത്തിരിക്കുകയാണ്. ഇവർ ഇവിടെ ജലരാധന നടത്തുകയും, കാവി പതാക ഉയർത്തുകയും ചെയ്തത് സ്മാരകം ശിവക്ഷേത്രമായിരുന്നുവെന്ന് അവകാശപ്പെട്ടാണ്. കസ്റ്റഡിയിലെടുത്തിരിക്കുന്നത് അഖില്‍ ഭാരത് ഹിന്ദു മഹാസഭയുമായി ബന്ധമുള്ള മീരാ റാത്തോഡിനെയാണ്. ഇവരെ കസ്റ്റഡിയിലെടുത്തത് സെൻട്രല്‍ ഇൻഡസ്ട്രിയല്‍ സെക്യൂരിറ്റി ഫോഴ്സ് (സി ഐ എസ് എഫ്) ആണ്.
യുവതിയെ ചോദ്യം ചെയ്തുവരികയാണെന്ന് അറിയിച്ച ഉദ്യോഗസ്ഥർ, വീഡിയോ പകർത്തിയ ആളെ കണ്ടെത്താൻ ശ്രമിക്കുകയാണെന്നും വ്യക്തമാക്കി. അതോടൊപ്പം ഇവരെ ഉടൻ തന്നെ പൊലീസിന് കൈമാറുമെന്നും, ഔപചാരികമായി സംഭവത്തെക്കുറിച്ച്‌ പരാതി നല്‍കുമെന്നും അവർ കൂട്ടിച്ചേർത്തു. രണ്ട് ദിവസം മുൻപ് ഇതേ സംഘടനയിലെ രണ്ടു പേരെ അറസ്റ്റ് ചെയ്‌തിട്ടുണ്ടായിരുന്നു. ഇത് യുനെസ്‌കോയുടെ ലോക പൈതൃക പട്ടികയിലുള്‍പ്പെട്ട താജ് മഹലില്‍ സമാനമായ ആചാരം നടത്തിയെന്നാരോപിച്ചായിരുന്നു.