ഗുരുവായൂർ ക്ഷേത്രത്തിലെ വൃശ്ചിക മാസ ഏകാദശിയിലെ ഉദയാസ്തമയ പൂജ മാറ്റിയതിനെതിരായ ഹർജി സുപ്രീം കോടതി ഇന്ന് പരിഗണിക്കും.
ഉദയാസ്തമയ പൂജ മാറ്റുന്നത് ആചാരത്തിന്‍റെയും ദേവഹിതത്തിന്‍റെയും ലംഘനമാണെന്ന് ചൂണ്ടിക്കാട്ടി തന്ത്രി കുടുംബമായ ചേന്നാസ് ഇല്ലമാണ് സുപ്രീംകോടതിയില്‍ ഹര്‍ജി നല്‍കിയത്. ഇന്ന് ഏകാദശി ദിനമായതിനാല്‍ തന്നെ ഹര്‍ജി അടിയന്തരമായി പരിഗണിക്കണമെന്ന് അഭിഭാഷകന്‍ ഇന്നലെ ആവശ്യപ്പെടുകയായിരുന്നു.
ഇതിനെ തുടർന്നാണ് ഹർജി ഇന്ന് പരിഗണിക്കാമെന്ന് ചീഫ് ജസ്റ്റിസ് സഞ്ജീവ് ഖന്ന അഭിഭാഷകനെ അറിയിച്ചത്. നേരത്തെ, ഉദയാസ്തമയ പൂജ തുലാം മാസത്തിലെ ഏകാദശി ദിനത്തില്‍ നടത്താന്‍ ഗുരുവായൂർ ദേവസ്വം ഭരണസമിതി തീരുമാനിച്ചത് ചോദ്യം ചെയ്താണ് തന്ത്രി കുടുംബമായ ചേന്നാസ് ഇല്ലത്തിലെ അംഗങ്ങള്‍ ഹർജിയുമായി കോടതിയെ സമീപിച്ചത്.
ഗുരുവായൂരില്‍ വന്‍തിരക്കുണ്ടാകുന്ന ഏകാദശി ദിവസം ഉദയാസ്തമയ പൂജ നടന്നാല്‍ ഭക്തർക്ക് അത് അസൗകര്യമാകുമെന്ന് ചൂണ്ടിക്കാട്ടിയാണ് പൂജ മാറ്റാന്‍ ഭരണസമിതി തീരുമാനിച്ചിരുന്നത്. എന്നാല്‍, പൂജ ആചാരമല്ല വഴിപാട് മാത്രമാണെന്നായിരുന്നു ഭരണസമിതിയുടെ വാദം