2019ലെ അയോധ്യാ വിധിയെ വിമർശിച്ച്‌ സുപ്രിംകോടതി മുൻ ജഡ്ജി ജസ്റ്റിസ് ആർ.എഫ് നരിമാൻ. ഈ വിധിയില്‍ മതേതരത്വത്തെ പരിഗണിച്ചില്ലെന്നും നീതിയുടെ വലിയ പരിഹാസമാണെന്നും അദ്ദേഹം വ്യക്തമാക്കി.
‘മതേതതരത്വവും ഇന്ത്യൻ ഭരണഘടനയും’ എന്ന വിഷയത്തില്‍ പ്രഥമ ജസ്റ്റിസ് അഹമദി അനുസ്മരണ പ്രഭാഷണം നിർവഹിക്കുകയായിരുന്നു അദ്ദേഹം. മസ്ജിദുകള്‍ക്ക് താഴെ ക്ഷേത്രങ്ങളുണ്ടെന്ന അവകാശ വാദങ്ങള്‍ നിരന്തരം ഉയരുന്നതിലും അദ്ദേഹം ആശങ്ക പ്രകടിപ്പിച്ചു.
അയോധ്യയില്‍ ബാബരി മസ്ജിദ് പൊളിച്ചയിടത്ത് ക്ഷേത്രം നിർമിക്കാനുള്ള വിധിയെ രൂക്ഷമായാണ് അദ്ദേഹം വിമർശിച്ചത്. ‘ഓരോ തവണയും നിയമവാഴ്ചക്ക് എതിരായി ചെയ്യുന്നത് ഹിന്ദുപക്ഷമാണ്. പള്ളി പൊളിച്ചതിന് എന്തായിരുന്നു നഷ്ടപരിഹാരം? പള്ളി പുനർനിർമിക്കുമെന്നായിരിക്കും എല്ലാവരും കരുതുക. പക്ഷെ, പള്ളി പണിയാൻ അവർക്ക് സ്വന്തമായി കുറച്ച്‌ സ്ഥലം നല്‍കുകയാണ് ചെയ്തത്. എെൻറ വിനീതമായ അഭിപ്രായത്തില്‍, ഈ വിധിയിലൂടെ മതേതരത്വത്തിന് അർഹതൊയൊന്നും ലഭിച്ചില്ല എന്നത് നീതിയുടെ വലിയ പരിഹാസമാണ്’ -ജസ്റ്റിസ് നരിമാൻ പറഞ്ഞു.
‘1857 മുതല്‍ 1949 വരെ അവിടെ മുസ്ലിംകള്‍ പ്രാർഥിക്കുന്നുണ്ടെന്ന് കോടതി കണ്ടെത്തിയതാണ്. എന്നാല്‍, കോടതി പറയുന്നത് ഇത് തർക്കഭൂമിയാണെന്നാണ്. അതിനാല്‍ തന്നെ ഒരു വിഭാഗത്തിേൻറത് മാത്രമാണെന്ന് എങ്ങനെ പറയാനാകും. ഇപ്പോള്‍ ഹിന്ദു ഭാഗത്തിന് മാത്രമായി അത് മാറിയിരിക്കുന്നു.
1528ലാണ് ബാബരി മസ്ജിദ് നിർമിക്കുന്നത്. 1853ല്‍ പ്രശ്നം ഉണ്ടാകുന്നത് വരെ അത് പള്ളിയായി തുടർന്നു. പിന്നീട് 1858ല്‍ അകത്തും പുറത്തുമുള്ള നടുമുറ്റത്തിന് ഇടയിലൂടെ ഈസ്റ്റ് ഇന്ത്യാ കമ്ബനി ഒരു മതില്‍ പണിതു. അകത്തെ നടുമുറ്റമായിരുന്നു പള്ളിയുടെ പരിസരം. മതില്‍ പണിതതോടെ ഇരുകൂട്ടരും പ്രാർഥനകള്‍ നടത്തി. പുറത്ത് ഹിന്ദുക്കളും അകത്ത് മുസ്ലിംകളും പ്രാർഥന നിർവഹിച്ചു.
1857 മുതല്‍ 1949 വരെ ഇരു കൂട്ടരും ഇവിടെ പ്രാർഥന നിർവഹിച്ചിട്ടുണ്ട് എന്നത് രേഖപ്പെടുത്തിയ വസ്തുതയാണ്. 1949ല്‍ 60ഓളം പേർ പള്ളിയില്‍ അതിക്രമിച്ച്‌ കയറി വിഗ്രഹങ്ങള്‍ സ്ഥാപിക്കുകയായിരുന്നു. ഇതോടെ മുസ്ലിംകള്‍ പ്രാർഥന അവസാനിപ്പിച്ചു’ – നരിമാൻ വ്യക്തമാക്കി.
ബാബരി മസ്ജിദ് തകർത്ത ഗൂഢാലോചന കേസിലെ എല്ലാ പ്രതികളെയും വെറുതെവിട്ട ജഡ്ജിയെ ഉത്തർ പ്രദേശ് ലോകായുക്തയായി നിയമിച്ചതിനെയും അദ്ദേഹം പ്രഭാഷണത്തില്‍ പരാമർശിച്ചു. മൂന്നര വർഷമെടുത്താണ് വിധി പറഞ്ഞത്. അവസാനം എല്ലാവരെയും വെറുതെവിടുകയായിരുന്നു. എല്ലാവരെയും വെറുതെവിട്ടശേഷം അദ്ദേഹം വിരമിക്കുകയും പിന്നീട് ലോകായുക്തയായി ചുമതലയേല്‍ക്കുകയും ചെയ്തുവെന്നും നരിമാൻ പറഞ്ഞു.
പള്ളികള്‍ക്ക് താഴെ ക്ഷേത്രമുണ്ടെന്ന് കാണിച്ച്‌ കേസുകള്‍ ഫയല്‍ ചെയ്യുന്ന പ്രവണത സാമുദായിക സംഘർഷത്തിനും അസ്വാരസ്യങ്ങള്‍ക്കും കാരണമാകുമെന്ന് അദ്ദേഹം വ്യക്തമാക്കി. ഇത് ഇന്ത്യയുടെ മതേതര അടിത്തറ തകർക്കുകയാണ്.
എല്ലായിടത്തും കേസുകള്‍ക്ക് പിന്നാലെ കേസുകളാണ്. പള്ളികളുടെ മേല്‍ മാത്രമല്ല, ഇത് ദർഗയിലേക്കും നീളുന്നു. ഇതെല്ലാം നമ്മുടെ ഭരണഘടനക്കും ആരാധനാലയ നിയമത്തിനും എതിരാണ്. ബാബരി വിധിയില്‍ ആരാധനാലയ നിയമത്തെ ഉയർത്തിപ്പിടിക്കുന്ന അഞ്ച് പേജുകള്‍ പ്രയോഗിക്കുക എന്നതാണ് ഇതിനെ പ്രതിരോധിക്കാനുള്ള ഒരേയൊരു മാർഗം. ഇത് സുപ്രിംകോടതിയുടെ നിയമപ്രഖ്യാപനം ആയതിനാല്‍ ഓരോ ജില്ലാ കോടതിയിലും ഹൈക്കോടതിയിലും ഇത് വായിക്കണമെന്നും അദ്ദേഹം പറഞ്ഞു.